കൊയിലാണ്ടി: (koyilandy.truevisionnews.com) മൂന്ന് ദിവസങ്ങളിലായി സിനിമാ പ്രേമികൾക്ക് ദൃശ്യവിരുന്നൊരുക്കിയ എട്ടാമത് മലബാർ മൂവി ഫെസ്റ്റിവലിന് കൊയിലാണ്ടിയിൽ തിരശ്ശീല വീണു. സമാപന ദിവസത്തോടനുബന്ധിച്ച് ചലച്ചിത്ര ലോകത്തെ പ്രസക്തമായ വിഷയങ്ങൾ ചർച്ച ചെയ്തുകൊണ്ട് വിപുലമായ ഓപ്പൺ ഫോറവും രാജ്യാന്തര-പ്രാദേശിക ചിത്രങ്ങളുടെ പ്രദർശനവും സംഘടിപ്പിച്ചു.
ഫെസ്റ്റിവലിന്റെ ഭാഗമായി നടന്ന ഓപ്പൺ ഫോറത്തിൽ 'മലയാള സിനിമ: ഡബ്ല്യു.സി.സിക്ക് ശേഷം' എന്ന സമകാലിക പ്രാധാന്യമുള്ള വിഷയം ചർച്ചയായി. പ്രമുഖ ചലച്ചിത്ര പ്രവർത്തകരായ പ്രതാപ് ജോസഫ്, പ്രേമൻ തറവട്ടത്ത്, എൻ.ഇ. ഹരികുമാർ എന്നിവർ ഈ ഓപ്പൺ ഫോറത്തിൽ പങ്കെടുത്തു സംസാരിച്ചു. മധു കിഴക്കയിൽ ചർച്ചയുടെ മോഡറേറ്ററായി പ്രവർത്തിച്ചു.
ഇറാനിയൻ ചിത്രമായ 'അണ്ടർ ദ സ്നോ', പോളണ്ടിൽ നിന്നുള്ള 'ലൗ പ്രോക്സി', ബംഗ്ലാദേശി ചിത്രം 'ദ റിവർ' എന്നീ ലോകോത്തര ഹ്രസ്വചിത്രങ്ങൾ മേളയുടെ അവസാന ദിനങ്ങളിൽ കാണികൾക്കായി പ്രദർശിപ്പിച്ചു.
ഇവയോടൊപ്പം തന്നെ ശ്രദ്ധേയമായ മലയാള ചിത്രങ്ങളായ 'ഫെമിനിച്ചി ഫാത്തിമ', 'പലമ', 'വിക്ടോറിയ' എന്നിവയും, ഏറെ ചർച്ച ചെയ്യപ്പെട്ട 'റെക്കോർഡ് ഡാൻസ്' ഡോക്യുമെന്ററിയും മേളയിൽ പ്രദർശിപ്പിച്ചു. മികച്ച ജനപങ്കാളിത്തത്തോടെയാണ് മൂന്ന് ദിവസത്തെ ഈ ചലച്ചിത്രോത്സവം സമാപിച്ചത്.
Content Highlight: The curtain falls on the film festival in Koyilandy
