ഉരുപുണ്യകാവ് ക്ഷേത്രത്തിന് മാസ്റ്റർ പ്ലാൻ; വികസനത്തിന് എൻ.ഐ.ടിയുടെ സഹായം

മൂടാടി: (koyilandy.truevisionnews.com) നന്തി ബസാർ ഉരുപുണ്യകാവ് ദുർഗാ ഭഗവതി ക്ഷേത്രത്തിന്റെയും പരിസര പ്രദേശങ്ങളുടെയും സമഗ്ര വികസനം ലക്ഷ്യമിട്ട് വിശദമായ മാസ്റ്റർ പ്ലാൻ തയ്യാറായി. കോഴിക്കോട് എൻ.ഐ.ടിയിലെ ആർക്കിടെക്ചർ ആൻഡ് പ്ലാനിംഗ് വിഭാഗം മേധാവി ഡോ. എ.കെ. കസ്തൂർബയുടെ നേതൃത്വത്തിലാണ് പദ്ധതി രൂപകൽപ്പന ചെയ്തത്.

ക്ഷേത്രത്തിന് സമീപത്തുകൂടി കടന്നുപോകുന്ന തീരദേശ റോഡ് വഴി വരാനിരിക്കുന്ന വികസന സാധ്യതകൾ മുൻനിർത്തിയാണ് പ്ലാൻ തയ്യാറാക്കിയിരിക്കുന്നത്. കർക്കടക വാവുബലി ഉൾപ്പെടെയുള്ള വിശേഷ ദിവസങ്ങളിൽ അനുഭവപ്പെടുന്ന തിരക്ക് നിയന്ത്രിക്കാൻ പാകത്തിലാണ് ഇതിന്റെ ഘടന.

ഈ മാസ്റ്റർ പ്ലാനിലുള്ള വികസന പ്രവർത്തനങ്ങൾ കേരള ടൂറിസം വകുപ്പിന്റെയോ മൂടാടി പഞ്ചായത്തിന്റെയോ വാർഷിക പദ്ധതികളിൽ ഉൾപ്പെടുത്തി നടപ്പിലാക്കുന്നതിനായി പഞ്ചായത്ത് ഹാളിൽ പ്രത്യേക ചർച്ച സംഘടിപ്പിച്ചു. പദ്ധതിയുടെ രേഖകൾ ക്ഷേത്രം എക്സിക്യൂട്ടീവ് ഓഫീസർ അജിത്ത് പറമ്പത്ത്, മൂടാടി പഞ്ചായത്ത് പ്രസിഡന്റ് എം.പി. അഖിലയ്ക്ക് കൈമാറി.

ചടങ്ങിൽ വൈസ് പ്രസിഡന്റ് സി.കെ. ശ്രീകുമാർ, വാർഡ് മെമ്പർമാരായ പപ്പൻ മൂടാടി, കാട്ടിൽ സത്യൻ, ക്ഷേത്ര ട്രസ്റ്റി ചെയർമാൻ സി.കെ. വാസു, ട്രസ്റ്റി അംഗങ്ങളായ ഗോപാലകൃഷ്ണൻ നമ്പീശൻ, യു.കെ. ബാബു, ഷിബു തോട്ടത്തിൽ, പി.വി. ഗംഗാധരൻ തുടങ്ങിയവർ പങ്കെടുത്തു.

Content Highlight: NIT Kozhikode Prepares Master Plan For Nandi Bazar Urupunyakaavu Durga Bhagavathi Temple

#Latest News #Urupunyakaavu Temple #Master Plan #NIT Kozhikode